هلمند کې د امریکايي اشغالګرو څخه د خپلواکۍ اخیستلو دوېمه کلیزه ولمانځل شوه
د سه شنبې ورځ (١٤٤٥/١/٢٨) د یو لړ ځانګړو مراسمو پر مهال د اسد ۲۴ د امریکا او ناټو ځواکونو د ماتې او د اسلامي امارت د بریا ورځ د دې ولايت په مرکز لښکرګاه ښار په مرکزي ورزشي لوبغالي کې ولمانځل شوه.
د هلمند مرستیال والي الحاج مولوي عبدالرحمان کندوزي خبرې وکړې او تر هر څه وړاندې یې د اسلامي امارت د بریا دوه کلن کېدلو او د امریکا په ماتېدو سره ټولو هېوادوالو ته د دې سترې بریا مبارکي وړاندې کړه.
لښکرګاه ښاروال الحاج مولوي عبدالله روحاني وویل، د افغانستان غیرتي او مجاهد ولسونو دلته یرغلګرو ته شرموونکې ماتې ورکړې دي او د خپل هېواد خاوره یې د دوی د شومو موخو له کارولو څخه د ځوانانو د سر په بدله ساتلې ده.
د علماوو شورا مرستیال شېخ مولوي محمد ګل محمدي وویل، د دې بریا شکر باید ادا کړل شي؛ نوموړي زیاته کړه، مجاهدینو په تېرو شلو کلونو کې د هېواد د خپلواکۍ لپاره ډېرې ستړتیاوې وګاللې، چې تاریخ یې شاهد دی.
د غونډې په وروستیو کې بېلابېل ورزشي او نظامي حرکتونه نندارې ته وړاندې شول.
د اهل تشیع په استازیتوب قومي مشر محمد کبیر په خپلو خبرو کې د اسلامي امارت د مسؤلينو د دوه کلن مزل فعالیتونه د ستاینې وړ وبلل او ویې ویل، موږ چمتو یو تر څو د دې نظام د پایښت لپاره خپل سرونه قرباني کړو.
۱۴۴۵/۱/۲۸ هـ ق
۱۴۰۲/۶/۲۴ هـ ش
