نیمروز کې ځوانانو ته د حضرت محمد "صلی الله علیه وسلم" د مبارک سيرت په اړه يو ورځنی سمينار وړاندې شو
د نيمروز ولايت د اطلاعاتو او کلتور ریاست له لورې ځوانانو ته د جناب حضرت محمد مصطفی "صلی الله علیه وسلم" د مبارک سیرت په اړه علمي او معلوماتي يو ورځنی سمینار د یاد رياست د غونډو په تالار کې تر سره شو.
سمينار د قرآن کريم د څو مبارکو آياتونو په تلاوت سره پېل شو، ورپسې د اطلاعاتو او کلتور رئيس مفتي حبيبالله الهام ګډونوالو ته د ښه راغلاست ترڅنګ وويل: د اسلام د ستر پیغمبر صلی الله علیه وسلم د سیرت زده کړه د ټولو مسلمانانو لپاره اړینه ده، چې پرې پوه شي او خپل ژوند د هغه مبارک "صلی الله علیه وسلم" د ژوند سره سم عیار کړي، ترڅو په دنیا او آخرت کې بریالي اوسي.
ښاغلي الهام زیاته کړه؛ دغه سیمینار د ربیعالأول د میاشتې په مناسبت، چې د اسلام د ستر پیغمبر "صلی الله علیه وسلم" د زوکړې میاشت ده، جوړ شوی و.
د نیمروز ولایت د اطلاعاتو او کلتور رئیس او د سمينار وړاندې کوونکي مفتي حبیبالله الهام د رسول الله صلی الله علیه وسلم د نسب، د ژوند په څلورو پړاوونو (د بعثت څخه مخکې، له بعثت څخه وروسته، هجرت او وفات)، د هغه د غزواتو او شخصیت په تړاو هر اړخيزه معلومات وړاندې کړل.
د سمینار په پای کې هغه ګډونوالو ته چې د اسلام د ستر پیغمبر د شخصیت په اړه یې پوښتنو ته سم ځوابونه ورکړه، ډالۍ ورکړل شوې.
۱۴۴۶/۳/۱۹ هـ ق
۱۴۰۳/۷/۱ هـ ل
