نیمروز کې ځوانانو ته د انساني قاچاق د زیانونو او ناوړه پایلو اړوند علمي او معلوماتي سمینار ترسره شو
د نیمروز ولایت د اطلاعاتو او کلتور ریاست له لوري د عالیقدر امیرالمؤمنین حفظه الله د فرمان د ښه تطبیق په موخه د عامه پوهاوي په برخه کې د انساني قاچاق د زیانونو او ناوړه پایلو تر عنوان لاندې يو ورځنی علمي او معلوماتي سمینار د ځوانانو لپاره د همدې رياست د غونډو په تالار کې ترسره شو.
د اطلاعاتو او کلتور رئيس مفتي حبيبالله الهام وویل: اسلامي امارت تل هڅه کړې ده، چې د ټولو هېوادوالو حقونو ته پوره درناوی وشي، چې پر همدې بنسټ د عالیقدر امیرالمؤمنین حفظه الله وروستۍ فرمان (د انساني قاچاق د مخنیوي اړوند) صادر شو تر څو د ولسونو ټول اسلامي او انساني اعزاز خوندي شي او د ناقانونه تګ په پایله کې له ستونزو او کړاوونو څخه وژغورل شي.
ښاغلی الهام له ګډونوالو او ټولو هېوادوالو وغوښتل، تر څو د ناقانونه تګ له اضرارو او ناوړه پایلو ځانونه خبر کړي او ټول هڅه وکړي، تر څو په ګډه دا شومه پدیده له منځه یوسي.
د سمينار وړاندې کوونکي دیني عالم شیخ محمد محسن روحاني د اسلام، قرآن او حدیث له نظره د انساني قاچاق د مخنیوي، د هغې د زیانونو او بدو پایلو په اړه معلومات ورکړل او ویې ویل: الله تعالی موږ او تاسو ته امر کړی، چې ټولنه اصلاح کړو، ځوانانو او ټولنې ته د ښو کارونو لارښوونه وکړو، د ټولو مسلمانانو دنده ده او د اسلامي نظام مسؤولیت دی، چې خلکو ته په نېکۍ لارښوونه وکړي، له بدو څخه يې منع کړي او د الله تعالی احکامو ته يې راجع کړي.
ښاغلي روحانی ځوانان د ټولنې یوه مهمه برخه او شتمني وبلله او زياته يې کړه؛ د دښمن په دسیسو مه غولېږئ او د قاچاق له لارې بهرنیو هېوادونو ته سفر مه کوئ، ځکه چې په دې کې ستاسو د دنیا او آخرت زیان دی.
۱۴۴۶/۷/۱۳ ق
۱۴۰۳/۱۰/۲۵ ل
