نږدې ۴ میلیونو کورنیو او بهرنیو سیلانیانو د هېواد له تفریحي سیمو او طبیعي جاذبو څخه لیدنه کړې ده

سه شنبه ( ۱۶ م د ذوالحجې ۱۴۴۷) د اطلاعاتو او فرهنګ وزارت اړوند د ګرځندوی فعاليتونو د سمون رياست د معلوماتو له مخې د لوی اختر په ورځو کې نږدې ۴ میلیونه کورنیو او بهرنیو سیلانیانو د هېواد له تفریحي سیمو او طبیعي جاذبو څخه لیدنه کړې ده.
یاد سیلانيان تر ټولو زیات هغو ولایتونو ته تللي دي، چې مهمې طبیعي، تاریخي او فرهنګي جاذبې لري، د سیلانیانو دا شمېر د تېرو کلونو په پرتله د پام وړ زیاتوالی ښيي، چې عمده لاملونه د اطلاعاتو او فرهنګ وزارت په هڅو د نویو تفریحي او سیاحتي سیمو پېژندنه، سیلانیانو لپاره د اسانتیاوو برابرول، د ا.ا.ا له لوري د رغنيزو او بنسټيزو پروژو پلي کول او د ډاډمن امنیت شتون دی چی د کورني سیاحت د ودې، پياوړتیا او د بهرنیو سیلانیانو د جذب څرګندونه کوي.

یو شمېر سیلانیان له خپلو سفرونو څخه د خوښۍ څرګندولو ترڅنګ د نظم، امنیت او د ولسونو د مېلمه پالنې ستاینه کوي، د دوی په وینا؛ د افغانستان ټول ولایتونه ښکلي دي، خو سږ کال د امنیت او ګرځندوی سکتور کې د رامنځته شویو اسانتیاوو له امله سیاحتي سفرونه نه هیریدونکي وو.

د اطلاعاتو او فرهنګ وزارت له ټولو سيلانیانو څخه غواړي، چې د افغانستان د ټولو قومونو ځانګړو دودونو ته درناوی وکړي او د چاپيریال ساتنې او د عامه ځایونو پاکوالي او د سیاحتي جاذبو د ساتنې په برخه کې له اړوندو ادارو سره پوره همکاري وکړي.

دا په داسې حال کې ده، چې د کوچني اختر په شپو ورځو کې هم د دوو میلیونو څخه زیات کورنیو او بهرنیو سیلانیانو د هېواد له تفریحي سیمو او طبیعي جاذبو څخه لیدنه کړې وه.

۱۴۰۵/۳/۱۲ هـ ل