نورستان کې د نګارستان څانګه پرانستل کيږي
د اطلاعاتو او کلتور وزارت د نګارستان آمریت پلاوي د نورستان د اطلاعاتو اوکلتور رئیس مولوي سميع الحق حق بیان سره ناسته وکړه او د خپل کاري سفر په اړه یې ورسره معلومات شریک کړل.
د پلاوي مشر او د نګارستان آمر مفتي رفیع الله ناصح وویل: د سفر موخه یې په نورستان ولایت کې د ګالري یا د نګارستان څانګې پرانسته ده، ترڅو د نورو ولايتونو په څیر نورستان ولايت کې هم د نګارستان یوه څانګه ولرو.
نوموړي زياته کړه؛ په دغه نګارستان کې به هنري آثار نقاشی، خطاطي، میناتوری، شبکه کاري،کندنکاري او کولاش اثار ساتل کیږي.
پلاوي په یاده برخه کې د نورستان د اطلاعاتو اوکلتور رئیس څخه د همکارۍ غوښتنه وکړه.
د اطلاعاتو اوکلتور رئیس مولوي سميع الحق حق بیان راغلي پلاوي ته د ښه راغلاست ویلو ترڅنګ دوی ته د هر ډول همکارۍ ډاډ ورکړ.
نوموړي وويل: دوی به د هنر د ودې لپاره شته امکانات درېغ نه کړي او د هنر ژوندي ساتلو برخه کې له فرهنګیانو او هنرمندانو ستاینه او مننه کوي.
۱۴۴۶/۴/۱۰ هـ ق
۱۴۰۳/۷/۲۲ هـ ل
