ننګرهار کې د نارنج ګل دودیزه مشاعره ترسره شوه

د ننګرهار اطلاعاتو او فرهنګ ریاست له لوري د نارنج ګل دودیزه مشاعره د زرګونو ګډونوالو په شتون کې ترسره شوه، چې پکې د امارتي ادارو یو شمېر مسؤلینو، د ختیځ زون د زرګونه ولسونو سربېره د مرکز کابل او ګڼو نورو ولایاتو څخه راغلو د شعر او ادب مینوالو هم ګډون کړی و.
د ننګرهار اطلاعاتو او فرهنګ رییس مولوي ذبیح الله نوراني ګډونوالو ته د ښه راغلاست ویلو ترڅنګ له شاعرانو څخه وغوښتل چې خپلو اشعارو کې دې یووالي، د هېواد آبادۍ او د افغان اصل فرهنګ د پیاوړتیا لپاره کار وکړي.
مشاعره کې د اطلاعاتو او فرهنګ وزارت اړوند د فرهنګ او هنر معین مولوي عتیق الله عزیزي هم شعر د ولس غږ وباله او له شاعرانو څخه یې وغوښتل چې خپل اشعار دې د هېواد د ابادۍ او په بېلابېلو برخو کې د ولسونو د عامه پوهاوي لپاره ووایي.
یاده مشاعره کې ګڼ شمېر شاعرانو او ترنم کوونکو خپل ترتیب کړي حماسي او هېوادني اشعار په پوره ډاډمنه فضا کې ګډونوالو ته واورول، چې د ګډونوالو له تود هر کلي سره مخ شول.
د نارنج ګل دودیزه مشاعره چې هر کال د حمل په میاشت کې د ولسونو په پراخ ګډون سره ترسره کېده، سږ کال د اورښتونو او سېلابونو له امله د ثور میاشت کې ترسره شوه.

۱۴۴۷/۱۱/۱۸ هـ ق