میدان وردګو کې د مڼې ګل دودیزه مشاعره د زرګونو ګډونوالو په حضور کې ترسره شوه

د میدان وردګو ولایت د اطلاعاتو او فرهنګ ریاست له لوري د اطلاعاتو او فرهنګ وزارت اړوند د ترنم او ترانو ریاست په همکارۍ د مڼې ګل دوديزه مشاعره د دې ولايت مرکز اړوند د ابراهیم خیلو په کلي کې ترسره شوه، چې پکې د ولایتي ادارو مسۇلینو ترڅنګ د اطلاعاتو او فرهنګ وزارت د فرهنګ او هنر معین مولوي عتیق الله عزیزي، د خپرونو چارو معین ښاغلي مهاجر فراهي، د ا.ا.ا یو شمیر لوړ پوړو مسؤلینو، د هېواد په کچه  شاعرانو، لیکوالانو، ادیبانو،  فرهنګپالانو او په زرګونه د ادب مینوالو ګډون کړی و.
د اطلاعاتو او فرهنګ رئیس مولوي حبیب الله مجاهد د غونډې ګډونوالو ته د ښه راغلاست ترڅنګ وویل: د خوښۍ ځای دی چې زرګونه هېوادوال د امن او ورورولۍ په فضا کې د خپل فرهنګ د ساتنې او ودې په موخه د مڼې ګل په څلورویشتمه دودیزه مشاعره کې راټول شوي دي. نوموړي زیاته کړه، دغه ډول فرهنګي غونډې او مشاعرې د ملي یووالي، ورورولۍ او فرهنګي ارزښتونو د پیاوړتیا لپاره مهم رول لري.
ښاغلي مجاهد له شاعرانو څخه وغوښتل، چې په خپلو شعرونو کې د اشخاصو د ستاینې پر ځای د هېواد د پرمختګ، د اسلامي ارزښتونو د ساتنې، علم، یووالي او د ولس د عامه پوهاوي پیغامونو ته لومړیتوب ورکړي.
دغه راز د اطلاعاتو او فرهنګ وزارت د فرهنګ او هنر معین مولوي عتیق الله عزیزي پخپلو خبرو کې د مشاعرو د ټولنیزو او فرهنګي ګټو ترڅنګ وويل: چې داسې  ادبي غونډې نه یوازې د خلکو د فکري ودې سبب ګرځي، بلکې د اسلامي او ملي ارزښتونو په خپرولو کې هم مهم رول لري. ښاغلي عزیزي د دین له نظره د شعر ارزښت ته په اشارې وویل: هدفي او اصلاحي شعر کولای شي د خلکو په روزنه کې اغیزمن تمام شي او ټولنه له منفي افکارو څخه مثبت لوري ته سوق کړي.
 ورته مهال ګڼ شمېر شاعرانو په مشاعره کې حماسي، سوله‌ییز، د فکري ویښتابه او نورو بېلابېلو موضوعاتو په اړه اورېدونکو ته شعرونه واورول، چې د اورېدونکو له تود هرکلي سره مخ شول. 
ياده مشاعره مازيګر مهال پيل شوې وه، چې د شپې تر ناوخته پورې يې دوام وکړ.

۱۴۴۸/۱/۲۵ هـ ق