فراه کې ۶ لرغوني او تفريحي ځايونه ثبت شول
د فراه ولایت د اطلاعاتو او کلتور رئيس محمد عبدالحی سباوون د فرهنګ او ګرځندوی د آمر په ملتیا اناردرې ولسوالۍ ته د سفر پر مهال ۶ نوي لرغوني او تفريحي ځايونه ثبت کړل.
د فرهنګ او ګرځندوی آمر وویل: په دغو شپږ ځايونو کې د داودي په نوم يو لرغونی جومات، ۵ بادي ژرندي او د ذهکن کلي بورس تفريحي ځای شامل دي، چې شاوخوا ۹۰۰ کاله لرغونتوب لري.
د فرهنګ او ګرځندوی آمر لرغوني ځايونه او فرهنګي ميراثونه ژوندي او عيني اسناد بولي او زیاتوي؛ چې دغه ځايونه د ولس د لرغونتوب ښکارندويي کوي، د اطلاعاتو او کلتور ریاست د مسؤلينو له لوري به يې د ساتنې او بيارغونې لپاره هڅې وشي.
د سیمې يو تن ځايي اوسیدونکي او قومي مشر عبدالکریم وویل: داودي لرغونی جومات د اناردرې ولسوالۍ لومړنی جامع جومات و، چې له داود نومي کس څخه را پاتې او ۹۰۰ کاله لرغونتوب لري، له نیکونو او پخوانيو مشرانو څخه را پاتې ۱۲ بادي ژرندي د ميراثي کيسو له مخي هم شاوخوا ۹۰۰ کاله لرغونتوب لري، چې تر ډېره ترې کار اخیستل کېده.
۱۴۴۷/۴/۹ هـ ق
