فاریاب کې د کتابونو او هنري آثارو نندارتون پرانېستل شو
د فاریاب ولايت د اطلاعاتو او کلتور ریاست د میمنې ښاروالۍ او کتاب پلورونکو په همږغۍ د کتاب او کتاب لوستنې اونۍ په مناسبت د کتابونو او هنري آثارو درې ورځنی نندارتون د امارتي ادارو د مسؤلینو، فرهنګیانو، لیکوالانو، استادانو، زده کړیالانو او ځوانانو په حضور کې پرانیست.
د اطلاعاتو او کلتور رئيس مولوي شمس الدین محمدي ګډونوالو ته د ښه راغلاست ویلو ترڅنګ د دغه نندارتون د جوړېدو موخه د کتاب لوستنې کلتور ته وده ورکول وبلله او ویې ویل: ځوانان باید د نورو فعالیتونو ترڅنګ مطالعه یوه اساسي اړتیا وبولي او له علمي او فکري لارې د هېواد د ودې او پرمختګ په لاره کې ونډه واخلي.
د نندارتون ګډونوالو د اطلاعاتو او کلتور ریاست څخه د دې نندارتون د جوړولو له امله مننه وکړه او دا یې د کتاب لوستنې کلتور ته د ودې ورکولو په برخه کې یو مثبت او ګټور ګام وباله.
د یادونې وړ ده، چې دا نندارتون به درې ورځې دوام وکړي او ګډونوال کولای شي، هم مطالعه وکړي او هم د خپلې خوښې کتابونه په ځانګړي تخفیف ترلاسه کړي.
۱۴۴۶/۱۱/۱۷ هـ ق
