فاریاب کې د رسنیو له مسؤلینو او خبریالانو سره د همغږۍ ناسته ترسره شوه

د فاریاب د اطلاعاتو او کلتور ریاست د رسنیو له مسؤلینو او خبریالانو سره د همغږۍ ناسته ترسره کړه.
د اطلاعاتو او کلتور رئیس مولوي شمس الدین محمدي د رسنیو کړنې او فعالیتونو وارزول او فاریاب کې یې د رسنیو ترمنځ د اطلاع رسونې په بېلابېلو برخو کې  په لا زیاتې همغږۍ ټینګار وکړ.
د اطلاعاتو او کلتور رئیس د عامه اذهانو په رغونه کې د رسنیو پر رول خبرې وکړې او د خصوصي رسنیو د فعالیتونو د ملاتړ ترڅنګ یې د هېواد د رسنیو قانون مطابق د رسنیو له مسؤلینو څخه وغوښتل چې د خبرونو او راپورونو په جوړولو کې د اړونده ادارو سره پوره همغږۍ وکړي.
ښاغلي محمدي د هنري او فرهنګي ډالیو کانکور پروګرام ( چې هر کال د اطلاعاتو او کلتور وزارت له لوري په مرکز کې جوړېږي) معلومات ورکړل، او د رسنیو له مسؤلینو او خبریالانو څخه یې وغوښتل چې خپل غوره آثار په دې پروګرام کې نوماند کړي، ترڅو د تېرو کلونو په څېر یو ځل بیا ډېرې لاسته راوړنې د ځان او فاریاب خلکو په نصیب کړي.
۱۴۴۷/۲/۳ هـ.ق