غور ولايت کې د سيلانیانو د اوسېدو لپاره د هوټل او مېلمستون چارې پای ته ورسېدې
د اطلاعاتو او کلتور وزارت د پلان او پاليسۍ رياست له لوري په هېواد کې سيلانيانو ته د اسانتیاوو برابرولو په موخه غور، کاپيسا، نورستان او پکتيا ولايتونو کې د هوټلونو جوړولو په لړ کې د غور ولايت د منار جام په سيمه کې د هوټل او مېلمستون جوړېدو چارې بشپړې او ګټې اخستنې ته اماده شو.
د پلان او پاليسۍ رئيس قاري فدامحمد دوست وايي: د غور ولايت د منار جام سيمه کې هوټل د اطلاعاتو او کلتور وزارت د پراختيايي بوديجې څخه د شاوخوا شپاړلس میليونه افغانيو په لګښت سره جوړ او ګټې اخستنې ته اماده شوی دی.
د ښاغلي دوست په وينا؛ د روان کال تر پايه به په کاپيسا، نورستان او پکتیا ولايتونو کې هم د هوټلونو جوړولو چارې بشپړې او ګټې اخیستنې ته وسپارل شي، تر دې وړاندې په يادو ولايتونو کې د سیلانيانو د اوسېدو لپاره مناسب ځايونو شتون نه درلود، چې د دې هوټلونو په جوړېدو سره به هېواد کې د ګرځندوی صنعت پراختيا ومومي او سیلانيانو لپاره به لازمې اسانتیاوې رامنځته شي.
۱۴۴۶/۹/۴ ق
۱۴۰۳/۱۲/۱۴ ل
