غزني کې دوه لرغوني آبدې بیارغول کېږي
غزني کې د اطلاعاتو او کلتور وزارت له لوري د دوو میلیونو افغانیو په ارزښت د سلطان شهاب الدین غوري مقبره او د سردار لرغونې غونډۍ د بیا رغونې چارې پیل شوي دي.
د غزني ولایت د اطلاعاتو او کلتور رئیس ملا حمیدالله نثار د دغو پروژو د کارونو پرانېسته د ده یک ولسوالۍ په شهابالدین غوري مقبره کې وکړه او ویې ویل: شهاب الدین غوري د غوري سلطنت له پیاوړو باچاهانو څخه و، چې په وروستیو کلونو کې یې مقبره د طبیعي پېښو له امله زیانمنه شوې وه، همدا راز د غزني په مرکز کې د سردار لرغونې غونډۍ محافظتي دیوال چې تېر کال د سېلابونو له امله ویجاړ شوی و، بېا رغول کیږي.
ښاغلي نثار زیاته کړه، چې دغه سیمي دیوال به ۱۵۰۰ متره اوږدوالی او درې متره لوړوالی ولري، د دواړو پروژو ټولیز لګښت ۲ میلیونه او ۳۰۰ زره افغانۍ اټکل شوی دی او ټاکل شوې چې کارونه به یې د راتلونکو دوو میاشتو په موده کې بشپړ شي.
د ملا نثار په وینا، دا پروژې د اطلاعاتو او کلتور وزارت د پراختیایي بودیجي څخه تمویلېږي.
۱۴۴۷/۵/۱۸ هـ ق
