سلګونه بهرنيو او کورنيو سیلانیانو د غزني له موزيم څخه ليدنه کړې
د غزني ولايت د اطلاعاتو او کلتور رياست مسؤلين وايي د تير کال پرتله سږکال د موزيم د ليدونکو په شمير کې زياتوالی راغلی دی، د روان کال له پيله تراوسه ۲۷۱۲ تنو چې ۲۹۶ تنه يې بهرني سيلانيان و، د غزني ولايت له موزيم څخه ليدنه کړې ده.
د اطلاعاتو او کلتور رئیس مولوي حميدالله نثار وايي: دا مهال په موزيم کې ۱۵۰ قلمه آثار نندارې ته ایښودل شوي دي، چې له اسلامي دورې وړاندې او اسلامي دورو پورې تړاو لري، چې په ورځني ډول لسګونه ليدونکي لري.
د ښاغلي نثار په وينا؛ په موزيم کې ډبرين، فلزي، خټين، کاشي او مسي آثار ايښودل شوي، چې د غزنويانو، باختريانو، کوشانیانو او ساسانیانو دورو پورې تړاو لري.
د يادونې وړ ده چې د غزني موزيم په ۱۳۵۶ ھ ل کال کې جوړ شوی، چې د هيواد له بډايه موزيمونو څخه ګڼل کيږي.
۱۴۴۵/۹/۷ ھ ق
۱۴۰۲/۱۲/۲۷ ھ ل
