زابل کې د کتاب لوستنې يو ورځنى نندارتون جوړ شو

نن سه شنبه (۱۷د ذوالقعدې۱۴۴۴) زابل ولايت کې د اطلاعاتو او کلتور رياست له لورې د کتاب لوستنې په نوم د کتاب يو ورځنی نندارتون جوړ شو، چې پکې لسګونو تنو ځوانانو او زده کوونکو ګډون کړی و.
د یاد نندارتون په اړه د دغه ولایت د اطلاعاتو او کلتور رئيس مولوي رحمت الله حماد وايي، د نندارتون د جوړولو څخه يې موخه د ټولنې خلک او ځوانان مطالعې ته تشويقول دي، د همدې موخې د ترلاسه کولو لپاره مو د زابل په ولسواليو کې هم کتابتونونه فعال کړي دي، چې تر دې مهاله په شينکۍ او شاجوی ولسواليو کې درې کتابتونونه رسمي فعال شوي او په يو شمېر ولسواليو کې کتابتونونه شته چې تر اوسه رسمي نه دي ثبت شوي.
د نندارتون ګډونوالو هم د کتاب لوستنې نندارتون په جوړېدو خوښي څرګنده کړه او له ځوانانو يې وغوښتل چې مطالعه وکړي، دوی وويل، په کتابتون کې ټول سهولتونه شته بايد ځوانان له دې فرصته ګټه واخلي او د کتاب او مطالعې په واسطه خپله پوهه زياته کړي.