د ځوانانو چارو معینیت: جوزجان کې شاوخوا ۳ زره تنه له بېلابېلو ښوونيزو کورسونو فارغ شوي
د اطلاعاتو او کلتور وزارت د ځوانانو چارو معینیت له لوري د اکتید دفتر په همکارۍ جوزجان ولایت کې درې کلن ښوونیز پروګرام څخه نږدې ۳ زره تنه ځوانان له بېلابېلو ښوونیزو څانګو څخه فارغ شوي دي.
د ځوانانو چارو معینیت سرپرست مولوي سید محمد سعید د علم او مهارتونو د زده کړې پر ارزښت ټینګار وکړ او ویې ویل: د پوهې او تخصص ترلاسه کول فردي ودې او ټولنې ته د خدمت لپاره بنسټیز رول لري، غوره انسان هغه دی، چې نورو ته یې ګټه ورسیږي.
ښاغلي سعید زیاته کړه؛ د ځوانانو چارو معینیت هڅه کوي، چې د ورته پروګرامونو د پلي کولو له لارې په ټول هېواد کې د ځوانانو علمي او مسلکي ظرفیتونه پیاوړي کړي.
د جوزجان والي مولوي عبدالله سرحدي د دې ښوونیزې پروژې د تطبیق هرکلی وکړ او ویې ویل: د هېواد راتلونکی له ځوانانو سره تړلی دی، ځوانان باید د خپلو مسوولیتونو په درک کولو سره د عصري علومو او د ټولنې د اړتیا وړ مهارتونو زده کړې ته ځانګړې پاملرنه وکړي.
د جوزجان د اطلاعاتو او کلتور ریاست مسوولین وایي: دغه ښوونیزه پروژه د درې کلونو په موده کې په درې پړاوونو کې تطبیق شوه، چې له مخې یې په مستقیم ډول ۲۷۵۴ تنه ځوانان د انګلیسي ژبې، کمپیوټر، ګرافیک ډیزاین، آنلاین کار(فریلانسینګ) او ویب ډیزاین له څانګو څخه فارغ شول.
مسؤلینو زیاته کړه؛ د دغې پروژې په وروستي پړاو کې ۶۳۱ تنه ځوانان فارغ شول او سربېره پر دې، شاوخوا ۱۹ زره تنه نور هم په غیرمستقیمه توګه د دې پروګرام له ګټو برخمن شوي دي.
۱۴۴۷/۸/۱۰ هـ ق
