د ځوانانو ملاتړ ترلاسه کول موخو ته رسيدل دي

دغه څرګندونې د خوست ولايت والي مولوي عبدالله مختار د اطلاعاتو او کلتور رياست د غونډو په تالار کې د ځوانانو د مشورتي او همغږۍ په غونډه کې وکړې.
غونډه د اطلاعاتو او کلتور رئيس مولوي شاه حسين مسجدي په وينا پيل شوه، نوموړي د خوست والي، د امارتي ادارو مسؤلينو او ځوانانو ته د ښه راغلاست ترڅنګ وویل: دغې ناستې جوړولو څخه موخه د ځوانانو پر مټ د اسلامي او ملي ارزښتونو تر څنګ د هېواد د ګټو د خونديتوب، د کاري فرصتونو د رامنځته کولو او د لا ښې همغږۍ لارې چارې لټول دي.
په غونډه کې څو تنو ځوانانو د کاري فرصتونو رامنځته کولو، د تخنيکي او مسلکي زده کړو د اسانتياوو او د ځوانانو د انسجام لپاره د مرکزونو جوړېدو غوښتنه وکړه.
ورته مهال د خوست والي مولوي عبدالله مختار د ځوانانو غوښتنو ته د رسیدو ډاډ څرګند کړ او ویې ويل: خوښ يم، چې نن د فعالو او هڅاندو ځوانانو ترمنځ په مشورتي او د همغږۍ غونډه کې شتون لرم، ځوانان د ټولنې د ملا د تیر حيثيت لري، دوی چې د هر چا ملاتړ کړی، هغوی یې موخو ته رسولو دي.
ښاغلي مختار زياته کړه؛ د هېواد جوړول، له نورو هېوادونو سره سيال کول او د اسلامي نظام او وطن دفاع زموږ ګډ مسووليت دی، د دغو اهدافدو ترلاسه کولو په موخه د ځوانانو فعال او یو موټی پاتې کیدل اړین دي.
دغه راز د اطلاعاتو او کلتور ریاست د اطلاعاتو آمر او د ځوانانو چارو آمر وویل: خوست د خپل ستراتيژيک موقعيت له مخي د ټول زون ځوانانو لپاره د زده کړو، کار او مسلکي روزنې غېږ پرانيستې ده، د خوست ځوانان د دين او وطن د دفاع په لار کې تل چمتو پاتې شوي او دا خبره يې په عمل کې ثابته کړې ده. 

۱۴۴۷/۵/۲۱ هـ ق