د هرات په ادبي ټولنه کې د خطاطۍ د بېلابېلو لیکدودونو تخصصي ازموینه واخیستل شوه
د هرات اطلاعاتو او فرهنګ ریاست په همکارۍ د ادبي ټولنې له لوري د ۵۰ تنو ځوانانو ترمنځ د خطاطۍ د بېلابېلو لیکدودونو د سویې ټاکلو تخصصي ازموینه ترسره شوه.
د هرات د اطلاعاتو او فرهنګ ریاست مسؤلینو د فرهنګي او هنري پروګرامونو پر ملاتړ ټینګار وکړ او ویې ویل: د نورو فرهنګي فعالیتونو ترڅنګ د خطاطۍ هنر وده د اسلامي ارزښتونو، فرهنګي هویت او د ځوان نسل د استعدادونو په څرګندولو کې مهم رول لري.
د هرات ادبي ټولنې رئیس وايي؛ دغه ازموینه د ټولنې د روزنیزو پروګرامونو په دوام ترسره شوه او ګډونوال د روزنیزو پروګرامونو له بشپړولو وروسته، د خطاطۍ د بېلابېلو لیکدودونو په برخه کې وارزول شول.
د نوموړي په وینا، د ازموینې پایلې به په څلورو برخو (ښه، عالي، ممتاز او فوق ممتاز) کې اعلان شي او هغه هنرمندان چې ښې نمرې یې ترلاسه کړې، تصدیق پاڼې به ورکړل شي او له دې ازموینې څخه موخه د خطاطۍ د زدهکړو معیاري کول، د اسلامي اصیلو هنرونو زدهکړې ته د ځوانانو هڅول او د فرهنګي پروګرامونو او نندارتونونو لپاره د غوره استعدادونو پېژندل دي.
دا په داسې حال کې ده، چې د هرات ادبي ټولنه هر کال د روزنیزو پروګرامونو، نندارتونونو او تخصصي ازموینو په ترسره کولو سره په خطاطۍ او نورو ادبي او هنري برخو کې د ځوانانو استعدادونو د ودې او پېژندلو زمینه برابروي.
۱۴۴۸/۱/۱۳ هـ ق
