د نیمروز ولایت د خبریالانو او رسنیو د استازو سره د همغږۍ غونډه ترسره شوه
د نیمروز ولایت د خبریالانو او رسنیو د استازو سره نوبتي او د همغږۍ غونډه د ولایت مقام د غونډو په تالار کې د مرستیال والي سید سلیمان آغا بهیر په مشرۍ جوړه شوه، ناسته کې د نیمروز د اطلاعاتو او کلتور رئیس مفتي حبیب الله الهام، د اطلاعاتو آمر محمد ظریف یوسفزي، او د یاد ولایت د تصويري، غږیزو او چاپي رسنیو استازو ګډون کړی و.
د اطلاعاتو او کلتور رئیس حبیب الله الهام په نیمروز کې د فعالو رسنیو په اړه معلومات وړاندې کړل، نوموړي وویل: د رسنیو سره همغږي، ملاتړ، د اطلاعاتو شریکول، د ستونزو اورېدل، او ورته رسېدنه د یادو غونډو اساسي موخې دي، چې هره میاشت ترسره کېږي.
همدا راز مرستیال والي د رسنیو د اهمیت او مسؤولیت په اړه خبرې وکړې، هغه وویل: رسنۍ باید د ټولنې واقعیتونه خپاره کړي، له اوازو او شایعاتو څخه ډډه وکړي، او خپل مسؤولیت په ريښتيني ډول ترسره کړي، نوموړي ډاډ ورکړ، چې اسلامي امارت له ټولو هغو رسنیو ملاتړ کوي، چې خپل رسالت په سمه توګه ترسره کوي.
په غونډه کې د خبریالانو او رسنیو استازو د اطلاعاتو او کلتور له ریاست څخه مننه وکړه، چې د رسنیو سره یې ښې اړیکې او همکارۍ رامنځته کړي دي، هغوی خپلې ستونزې او وړاندیزونه شریک کړل او په ځینو مهمو موضوعاتو یې د نظرونو تبادله وکړه.
غونډه د دعا په ویلو سره پای ته ورسېده.
۱۴۴۶/۵/۲۶ هـ ق
۱۴۰۳/۹/۸ هـ ل
