د میدان وردګو مجاهد موزیم ته ۸ قلمه نظامي او لرغوني توکي وسپارل شول

تېره ورځ د میدان وردګو ولایت اړوند شهيد رحيم الله کوثر د ډلګۍ معاون حکمت الله حمزه، ملي راډیو تلویزیون آمر قاري احسان الله کلیوال، او عبدالرشيد له لوري ۸ قلمه نظامي او لرغوني توکي مجاهد ملي موزیم ته وسپارل شول.
په دغه توکو کې د حکمت الله حمزه او قاري احسان الله کلیوال له لوري ۷ قلمه نظامي توکي او د میدان ښار اوسېدونکي عبدالرشيد له لوري یو عدد جام چې سلګونه کاله تاریخي مخینه لري او آيت الکرسي پرې ليکل شوې  شامل دي.
مولوي حبيب الله مجاهد د دغه توکو سپارلو پر مهال له یادو کسانو مننه وکړه او ويې ویل: مجاهد ملي موزیم د دغه ولایت د عامو خلکو او مجاهدینو په واسطه غني کولای شو،نوموړي د میدان وردګو له ولس او په ځانګړي ډول مجاهدينو هیله وکړه، تر څو د مجاهد ملي موزیم په غني کولو کې د اطلاعاتو او کلتور ریاست سره مرسته وکړي.
همدا راز له ياد موزيم څخه د ميدان وردګو ولايت د علماوو شورا مشر شيخ الحديث مولوي فضل هادي فضلي ليدنه وکړه، ښاغلي فضلي د اطلاعاتو او کلتور رياست څخه د ياد موزيم د جوړولو له امله مننه وکړه او ياد موزيم يې د هغو وسلو د ساتلو لپاره مهم وباله کومې چې د اشغالګرو په وړاندې د مقابلې لپاره د مجاهدينو په لاس جوړې شوې دي.

۱۴۴۵/۷/۵ هـ ق
۱۴۰۲/۱۰/۲۶ هـ ش