د مطبعو، خپرندویانو اتحادیو، کتاب او کاغذ پلورونکو ستونزو ته د رسېدنې کمېټې غونډه وشوه
یکشنبه (۲۹ جماديالاول ۱۴۴۶) د اطلاعاتو او کلتور وزارت د بیهقي کتابونو د خپرونو ریاست په دفتر کې د مطبعو، خپرندویانو اتحادیو، کتاب او کاغذ پلورونکو ستونزو ته د رسېدنې کمېټې غونډه د دې ریاست د رئیس مولوي عبدالعلیم ځانواک مفتيزاده په مشرۍ د کمېټې د غړو په ګډون د دوی د ستونزو او ننګونو د حل لپاره وشوه.
غونډه د قرآن عظیم الشان د څو مبارکو آیتونو په تلاوت پیل شوه؛ وروسته د کمېټې غړو د خپلو ستونزو او ننګونو په اړه هر اړخیزې خبرې وکړې او د بیهقي کتابونو د خپرونو رئیس دوی ته د ستونزو د حل ډاډ ورکړ.
د غونډې په پای کې د خپرندویانو او کتاب پلورونکو ستونزو او وړاندیزونو په اړه پرېکړه وشوه، چې ( د خپرندویانو، کتاب پلورونکو او مطبعو لپاره د ځانګړي مارکېټ او فرهنګي بازار رامنځته کول، د خپرندویانو او شخصي کتاب پلورونکو لپاره ځانګړې مالي تخفیف، د کاغذ، خامو موادو، د قرآن کریم او کتابونو د چاپ لپاره د ګمرکي محصولاتو معافیت او تخفیف، د امارتي ادارو په ځانګړې توګه د لوړو زدهکړو او پوهنې وزارتونو اړتیا وړ کتابونو د کورنیو خپرندویانو او مطبعو څخه اخېستل، د ځانګړو دیپارتمنتونو (صحافت، ډیزاین، مینیاتوري، د کتابونو چاپ لپاره تخنیکي برق) جوړول) د لوړو زدهکړو بنسټونو لخوا د ریاست الوزراء منظورۍ ته واستول شي. غونډه د دعا په لوستلو پای ته ورسېده.
۱۴۰۳/۹/۱۱ ه ق
۲۰۲۴/۱۲/۱ زېږدیز
