د لوحو او تبلیغاتي اعلاناتو د اصلاح کمېسيون د کابل څلورمې ناحیې څخه څارنه وکړه
د اطلاعاتو او کلتور وزارت د خپرونو چارو معینیت اړوند د لوحو او تبلیغاتي اعلاناتو د اصلاح کمېسيون د خپلو ساحوي فعالیتونو په دوام د څلورمې ناحیې د تایمني سیمې اړوند څلورم او پنځم سړک سیمو کې د لوحو او تبلیغاتي اعلاناتو څخه څارنه وکړه.
د دغه پروګرام په پیل کې د کابل ښاروالۍ د کلتوري چارو رئیس قاري ولي گل جواد او د کمېسیون غړو، د یادې سیمې د ارزښت او د لوحو او تبلیغاتي اعلاناتو د اصلاح او څارنې د څرنګوالي په اړه له رسنیو او د اصنافو مسؤلینو سره خبرې وکړې.
وروسته هټۍ لرونکو او کسب کارانو سره د لوحو او تبلیغاتي اعلاناتو د اصلاح کمېسيون طرزالعمل او معیارونه په تفصیلي توګه شریک شول، تر څو خپلې لوحې او تبلیغاتي اعلانات د معیارونو له مخې تنظیم کړي.
همدارنګه د کمېسیون د مسلکي غړو له خوا د غیر معیاري لوحو او تبلیغاتي اعلاناتو د اصلاح په موخه د هېواد په ملي ژبو بدیلې کلمې وړاندې شوې او یو شمېر هټۍ لرونکو او کسب کارانو ته اصلاحی وړاندیزونه هم وشول.
د دغې سیمې هټۍ لرونکو او کسب کارانو د یاد کمېسیون فعالیتونه وستایل او د دوی هڅې یې د ملي ژبو د پیاوړتیا او د فرهنګي ارزښتونو د ساتنې په برخه کې مهمې وبللې.
د یادونې وړ ده، چې په دې څارنه کې د څه باندې ۱۸۰ لوحو او تبلیغاتي اعلاناتو پلټنه او اصلاح وشوه.
۱۴۴۷/۵/۱۳ هـ ق
