د فارياب اطلاعاتو او کلتور رياست څخه ٢٠٠ تنه زده کوونکي فارغ شول

 تېره ورځ د فارياب ولايت داطلاعاتو او کلتور رياست د ځوانانو چارو  عمومي مديريت له تعليمي مرکز څخه ٢٠٠ تنو زده کوونکو د فراغت په مناسبت په دغه رياست کې ديو شمېر دولتي ادارو د رئيسانو په ګډون غونډه جوړه شوه.
د غونډې پیل د یو تن ګډونوال لخوا د قرآنکریم د څو مبارکو آیاتونو په تلاوت سره و شو.
  ورپسې د فارياب ولايت د اطلاعاتو او کلتور رئيس مولوي شمس الدين محمدي د خبرو په ترڅ کې ګډونوالو ته ښه راغلاست وويل، او د دغه ولايت د اطلاعاتو او کلتور رياست د ځوانانو چارو دعمومي مديريت له تعليمي مرکز څخه د ٢٠٠ تنو ځوانانو، چې له دریو میاشتو وروسته یې د خطاطۍ، هنر، وینا، کمپیوټر، انګلیسي ژبې او ادبیاتو له څانګو څخه فارغ شول، مبارکي ور کړه. ښاغلي رئيس د خپلو خبرو په يوه برخه کې د مسلمانانو لپاره د اسلام له نظره د علومو او پوهې د زده کړې پر ارزښت، د ځوانانو لپاره په بېلابېلو برخو کې د غوره ښوونيزو خدمتونو په وړاندې کولو ټينګار وکړ. 
 ورپسې د دغه ولایت مالي او اداري رئیس الحاج مولوي حیات الله مهاجر او د پېښو پر وړاندې د مبارزې رئیس مولوي اسدالله وقاص په خپل وار سره په ټولنه کې د ساینس پر ارزښت خبرې وکړې او د علم د زده کړې غوښتنه یې وکړه. 
 د غونډې په وروستۍ برخه کې يو شمېر فارغانو هم خبرې وکړې او د دوی  لپاره يې د ښوونيزو خدمتونو په وړاندې کولو کې د اطلاعاتو او فرهنګ رياست د ځوانانو  چارو د عمومي مدیریت له همکاريو  مننه وکړه او غوښتنه يې وکړه چې په راتلونکي کې د دا ډول فعالیتونو ته دوام ورکړي.
۱۴۴۴/۸/۶ هـ ق
۱۴۰۱/۱۲/۸ هـ ش