د غزني ادبي بهیر میاشتنۍ غونډه ترسره شوه
د غزني ولایت د اطلاعاتو او کلتور ریاست په تالار کې د غزني ادبي بهیر مياشتنۍ غونډه او مشاعره ترسره شوه.
په دغه مشاعره کې ګڼ شمېر شاعرانو، ادب پالو او ځوانانو ګډون کړی وو، د مشاعرې د پیل په خبرو کې د غزني د اطلاعاتو او کلتور رئیس ملا حمیدالله نثار د یاد ادبي بهیر موخه د ادبي او کلتوري هڅو پیاوړتیا او د ټولنیز پرمختګ په اړه د مثبت فکر خپرول یاد کړل او له شاعرانو یې وغوښتل، چې د عامه افکارو په رغښت کې مثبت رول ولوبوي، نوموړي زياته کړه؛ چې د غزني ادبي بهیر غونډې او مشاعرې به دوام ولري او په دې برخه کې هر ډول همکاریو ته چمتو يو.
وروسته د غزني د بېلابېلو سیمو شاعرانو او نعت ویونکو خپلې دیکلمې او ترنمونه د مشاعرې ګډونوالو ته واورول.
همدارنګه دوی د غزني ادبي بهیر د مشاعرو د پیل له امله خوښي څرګنده کړه او د اطلاعاتو او کلتور ریاست له مسؤلینو یې مننه وکړه چې شاعرانو ته ځانګړې پاملرنه لري.
۱۴۴۶/۷/۲۹ ق
۱۴۰۳/۱۱/۱۱ ل
