(د شرعي نظام په استحکام کې د اطاعت اغېزې) کتاب لوستنې سیالۍ پایلې اعلان شوې
دغه سیالۍ چې څه موده وړاندې د روزګان اطلاعاتو او کلتور ریاست او الرباط فکري او فرهنګي ادارې په ګډو همکاریو د ۴۰۰ تنو ځوانانو ترمنځ ترسره شوې وه، پایلې یې اعلان او ۱۰ تنه مخکښ ګډونوال یې وستایل شول.
مسؤلینو د دغه ډول سیالیو ترسره کول ارزښتمند وبلل او ویې ویل: کتاب لوستنه د ټولنې د فکري پیاوړتیا، اطاعت، نظم او مسؤلیت مننې په روزنه کې مهم رول لري، مسؤلینو له ځوانانو څخه وغوښتل، چې د علمي او فکري فعالیتونو په برخه کې خپلو هڅو ته دوام ورکړي او د ورته نورو فرهنګي او فکري پروګرامونو د تنظیمولو ډاډ یې هم څرګند کړ.
د سیالۍ ګډونوالو د یادې سیالۍ له جوړولو څخه خوښي څرګنده کړه او ویې ویل: دا ډول سیالۍ د ځوانانو ترمنځ د مطالعې کچه لوړه وي او د شرعي نظام، اطاعت او مسؤلیت په اړه یې پوهاوی زیاتوي. د سیالۍ ګډونوالو له نورو ځوانانو څخه هم وغوښتل چې د کتاب لوستنې او علمي سیالیو په برخه کې فعاله ونډه واخلي.
په پای کې د اطلاعاتو او کلتور رئیس له لوري د دغه ریاست اړوند وړیا ښوونیز مرکز د استادانو هڅې هم وستایل شوې او د لا زیاتې هڅونې په موخه یې په مالي او معنوي ډاليو ونازول.
۱۴۴۷/۸/۱۰ هـ ق
