د رهبرۍ اړوند لس ورځنی روزنیز پروګرام پای ته ورسېد
چهارشنبه( ۲ د جمادی الثاني ۱۴۴۶) د اطلاعاتو او کلتور وزارت د ګرځندوی، مالي او اداري چارو معینیت د کارکوونکو چارو ریاست اړوند د ادارې د پراختيا او ظرفیت لوړونې آمریت لهخوا د رهبرۍ تر عنوان لاندې لس ورځنی روزنیز پروګرام چې د یاد وزارت د مرکزي ریاستونو ۳۵ تنو کارکوونکو لپاره جوړ شوی و، نن پای ته ورسېد.
يادو مراسمو کې د کارکوونکو چارو رئیس مولوي نقیبالله نعمان، د ظرفیت لوړونې او ادارې پراختیا آمر محمد عیسی خاطرزي او د ياد پروګرام ګډونوالو برخه اخیستې وه.
مراسم د قرآن عظیمالشان د مبارکو آیتونو په تلاوت پیل شول، ورپسې د کارکوونکو د چارو رئیس مولوي نقیبالله نعمان وویل: د اطلاعاتو او کلتور وزارت مشرتابه تل هڅه کوي، چې د کارکوونکو د ظرفیت لوړونې لپاره لنډ مهاله او اوږد مهاله روزنیز پروګرامونه جوړ کړي، نوموړي له ګډونوالو وغوښتل، چې له ورته فرصتونو څخه ګټه پورته کړي او د خپلو چارو د ښهوالي لپاره یې وکاروي.
په پای کې د اطلاعاتو او کلتور وزارت د کارکوونکو د چارو ریاست لهخوا ګډونوالو ته ستاينليکونه وویشل شول.
مراسم د دعا په ويلو سره پای ته ورسېدل.
۱۴۰۳/۹/۱۴ هـ ش
۲۰۲۴/۱۲/۴ میلادي
