د رسنیزو چارو  پیاوړتیاو په موخه د رسنیو له مسؤلینو، خبریالانو او د امارتي ادارو له ویاندویانو سره د همغږۍ ناستې وشوې

د زابل او کونړ ولایتونو د اطلاعاتو او فرهنګ ریاستونو له لوري د رسنیزو چارو  پیاوړتیاو په موخه د رسنیو له مسؤلینو، خبریالانو او د امارتي ادارو له ویاندویانو سره د همغږۍ ناستې وشوې.
په دغو ناستو کې د رسنیو پر ملاتړ، د روزنیزو سیمینارونو پر جوړېدو او د امارتي ادارو او رسنیو ترمنځ د لا ښې همغږۍ په اړه خبرې وشوې.
د اطلاعاتو او فرهنګ ریاستونو مسؤلینو وویل: رسنۍ د ولس او نظام ترمنځ د باور او پوهاوي مهم پل دی او باید د نظام لاسته راوړنې، د مشرتابه فرامین، عامه پوهاوی او مهم معلومات په دقیق، مسؤلانه او پر وخت ډول تر خلکو ورسوي. 
مسؤلینو د خبریالانو ترسره کړې هڅې وستایلې او زیاته یې کړه، چې اسلامي نظام په سترو قربانيو راغلی، ساتنه او د ولس خدمت د ټولو ګډ مسؤلیت دی.
د ناستو په لړ کې د رسنیو مسؤلینو او خبریالانو خپلې ستونزې او وړاندیزونه له مسؤلینو سره شریک کړل، چې د مسولینو له لوري د ستونزو د حل او وړاندیزونو ته د رسیدو ډاډ څرګند شو.

۱۴۴۷/۱۲/۲ هـ ق