د رسنیزو شکایتونو او سرغړونو کمېسیون نوبتي ناسته وشوه
چهارشنبه (د جمادی الاولی ۲۱مه، ۱۴۴۷ هـ ق) د اطلاعاتو او کلتور وزارت د وزیر، ښاغلي شیخ شیراحمد حقاني صاحب په مشرۍ د رسنیزو شکایتونو او سرغړونو کمېسیون نوبتي ناسته د وزارت مقام کې ترسره شوه.
په دغه ناسته کې، چې د کمېسیون د نورو غړو په حضور کې جوړه شوې وه، د رسنیزو شکایتونو او سرغړونو اړوند موضوعات وڅېړل شول.
ناسته کې لومړی د کابل ښار د چهاردهي او شاوخوا سیمو په اړه د یو شمېر رسنیو له لوري د یادو سیمو اصلي نومونو پر ځای د "نامناسبه" نوم کارولو، چې د ریاستالوزراء د عالي مقام د ۴۱۰۴ ګڼې حکم سره په څرګند ډول مغایرت لري، په څرنګوالي، په خوست ولایت کې د "ازمون راډیو " د مسؤل او مقابل لوري ترمنځ د رامنځته شوې ستونزې په اړه هم بحث وشو، چې دواړو خواوو خپل شکایتونه د رسنیزو شکایتونو او سرغړونو کمېسیون ته راجع کړي وو، همدا راز په يو شمېر نورو مهمو موضوعاتو هم بحث او د نظرياتو تبادله وشوه.
د ناستې په پای کې د ستونزو د کره څيړنې په موخه د کمېسيون له غړو څخه کميټې وټاکل شوې، تر څو راتلونکې غونډې ته د ستونزو کره راپور وړاندې کړي.
۱۴۰۴/۸/۲۱ هـ ل
