د رسنيو پر نشراتو د څار رياست له لوري له رسنیو او خبريالانو سره د همږغۍ ناسته وشوه

 د اطلاعاتو او کلتور وزارت د خپرونو چارو معينيت اړوند د مطبوعاتو او رسنیو پر نشراتو د څار ریاست له لوري د رسنيو له مسؤلينو او خبريالانو سره د همږغۍ ناسته وشوه.
په دې ناسته کې د هېواد د بېلابېلو خصوصي او دولتي رسنیو مسؤلینو او استازو ګډون کړی وو.
د مطبوعاتو او رسنیو پر نشراتو د څار رياست رئیس مولوي صفي الله رائد د پرانیستې وینا وکړه او د رسنیو له مسؤلینو یې وغوښتل، چې خپل مسؤلیت په سمه توګه ادا کړي، اسلامي او ملي ارزښتونه په پام کې ونیسي او د نظام سره په پوره توګه همکاري وکړي.
ورپسې د رسنیو مسؤلینو خبرې وکړې او غوښتنه یې وکړه، چې د اطلاعاتو او کلتور وزارت باید د رسنیو شته ستونزې هوارې کړي او اطلاعاتو ته د لاسرسي زمینه ورته برابره کړي، تر څو وکولای شي د غرب پلوه بهر میشتو رسنیو د منفي تبلیغاتو مخه ونیسي او ولس له کره معلوماتو پر وخت خبر کړي.
همدارنګه د اطلاعاتو او کلتور وزارت حقوقي سلاکار قاري سعید خوستي د رسنیو د مسؤلینو ستونزې واورېدې او ډاډ یې ورکړ، چې د هواري لپاره به یې هڅې کوي او یو داسې مېکانیزم به رامنځته کوي، چې د دواړو لوریو دوامداره همکارۍ ته زمینه برابره شي.
د ناستې په پاې کې د راتلونکو پلانونو او طرحو د جوړېدو په اړه هم نظرونه شریک شول.

۱۴۰۳/۱۱/۱۴ ل
۲۰۲۵/۲/۲ ز