د تاریخي آبداتو ساتنه د دولت او ملت ګډ مسوولیت دی
دغه څرګندونې د غزني والي ملا ولي جان حمزه د دې ولایت د اطلاعاتو او فرهنګ رئیس ملا حمیدالله نثار په ملتیا د غزني تاریخي منارونو، د سلطان محمود غزنوي آرامګاه، د حکیم سنایي مقبرې، د بهلول صاحب زیارت او د باباجي له تاریخي جومات څخه د لېدنې پرمهال وکړې.
د دې لېدنې پر مهال د اطلاعاتو او فرهنګ رئیس د دغو تاریخي ځایونو د هویت او لرغونتوب په اړه معلومات وړاندې کړل او له اړوندو ادارو څخه یې وغوښتل چې د دې ولایت د ځینو تاریخي آبداتو د ترمیم او بیارغونې لپاره جدي پاملرنه وکړي.
دغه راز د غزني والي تاریخي آبدات د هېواد د تاریخي او فرهنګي هویت ښکارندوی وبلل او ویې ویل: د دغو آثارو ساتنه د دولت او ملت ګډ مسوولیت دی.
نوموړي زیاته کړه، چې د اسلامي امارت د رهبر لومړۍ ګڼه فرمان، چې د هېواد د تاریخي ځایونو د ساتنې په اړه صادر شوی، باید په جدي توګه عملي شي. ښاغلي حمزه ژمنه وکړه چې د غزني ولایت د تاریخي آبداتو د ساتنې او بیارغونې لپاره به هېڅ ډول هڅې و نه سپموي.
۱۴۴۷/۱۲/۲۱ هـ ق
