د باميانو ولایت د نقاشۍ او خطاطۍ له هنرمندانو ملاتړ کوو
یادې څرګندونې د باميانو ولايت د اطلاعاتو او کلتور رئيس مولوي صفي الله رائد د دغه ولايت د نقاشۍ او خطاطۍ له هنرمندانو سره په کتنه کې وکړې.
په دې کتنه کې د باميانو ولایت دوو تنو هنرمندانو غلام حسين او عارف رضايي چې د خطاطۍ او نقاشۍ په برخو کې کار کوي، ښاغلي رائد ته د خپلو هنري کارونو په اړه معلومات ورکړل او د هنرمندانو لپاره يې د دغه رياست د ملاتړ غوښتنه وکړه.
ښاغلي رائد د دوی د هنري کارونو ستاینه وکړه او ویې ویل: د هنر او هنرمندانو د ملاتړ په برخه کې به هر ډول همکاري، چې د دغه ریاست په واک کې وي کوو.
ورپسې ښاغلي رائد له هنرمندانو سره ژمنه وکړه چې په دغه ولايت کې به د دوی د هنري آثارو د نندارې لپاره يو نندارتون جوړ کړي، تر څو د هنرمندانو د هڅونې او د دوی د آثارو د ودې لپاره ښه زمينه برابره شي.
۱۴۴۵/۲/۴ هـ ق
۱۴۰۲/۵/۳۰ هـ ش
