د اطلاعاتو او کلتور وزیر له اختیارالدین کلا، هرات موزیم او هریوا دارالفنون څخه لیدنه وکړه

شنبه(۲ د ذوالقعدې ۱۴۴۷) د اطلاعاتو او کلتور وزیر ښاغلي شیخ شیر احمد حقاني صاحب د خپرونو چارو د معین ښاغلي مهاجر فراهي په ملتیا هرات ولایت ته د خپل سفر په ترڅ کې،  له اختیارالدین تاریخي کلا، د هرات موزیم او د هریوا دارالفنون څخه لیدنه وکړه.
د لیدنې پر مهال ښاغلي شیخ شیر احمد حقاني صاحب د تاریخي میراثونو د ساتنې پر اهمیت ټینګار وکړ او ویې ویل: د هېواد تاریخي آبدات زموږ د ملي هویت مهمه برخه جوړوي، موږ ژمن یو، چې د دغو میراثونو د ساتنې، بیارغونې او راتلونکو نسلونو ته د پېژندنې لپاره عملي او دوامدارې هڅې ترسره کړو.
نوموړي زیاته کړه؛ چې د موزیمونو او دارالفنونونو په څېر د کلتوري او تعلیمي مرکزونو پراختیا کولای شي، د ځوان نسل د پوهاوي په لوړولو او د هغوی د تاریخ او کلتور سره د اړیکو په پیاوړتیا کې مهم رول ولوبوي.
د خپرونو چارو معین ښاغلي مهاجر فراهي صاحب وویل: د اطلاعاتو او کلتور وزارت هر کال د تاریخي آبداتو د ساتنې، ترمیم او بیارغونې لپاره ځانګړې بودیجه بېلوي او په دې برخه کې په دوامداره توګه هڅې روانې دي، څو د هېواد کلتوري میراثونه په معیاري ډول وساتل شي.
د اختیارالدین کلا او هرات موزیم د مسؤولینو په وينا؛ هره میاشت شاوخوا ۳۰۰۰ کورني سیلانیان د هېواد له بېلابېلو ولایتونو څخه د دغو تاریخي ځایونو لیدنه کوي، چې دا چاره د هرات د تاریخي او کلتوري آثارو پر وړاندې د خلکو د لېوالتیا د زیاتوالي څرګندونه کوي.
دغه لیدنه داسې مهال ترسره کېږي، چې هرات د هېواد له مهمو تاریخي او کلتوري مرکزونو څخه ګڼل کېږي او لا هم د لرغونو میراثونو د ساتنې او د ګرځندوی د پراختیا پروګرامونو په محور کې قرار لري.

۱۴۰۵/۱/۲۹ ھـ ل