د اطلاعاتو او کلتور وزارت له لوري د هرات د زلزله ځپلو لپاره د مرستې راټولونې لړۍ پیل شوه
نن چهارشنبه( ١٤٠٢/٧/١٩ هـ ش) د اطلاعاتو او کلتور وزارت د ځوانانو چارو معنيت له لوري د هېواد پلازمېنې کابل په بېلابېلو سيمو کې د هرات ولايت د زلزله ځپلو کورنيو لپاره د مرستو راټولونې درې ورځنى بهير پيل شو.
په دې اړه د ځوانانو چارو معين قاري محمد يونس راشد وايي: د کابل ښار په بېلابېلو مهمو او ګڼ مېشتو سيمو کې يې ځکه د مرستې راټولونې درې ورځنى بهير پيل کړ، تر څو وکولای شي په پراخه کچه د هرات زلزله ځپلو کورنيو لپاره مرستې راټولې کړي.
نوموړي له کورنيو او بهرنيو پانګوالو غوښتنه کړې، چې په دې اساسو شېبو کې د هرات ولايت زلزله ځپلو کورنيو سره خپلې مرستې ترسره کړي.
د دې ترڅنګ هغه کسان چې د مرستو په راټولو بوخت دي غوښتنه کوي، چې ولسونه دې په دغه برخه کې مرستې وکړي او مرستې به يې په پوره روڼتيا او صداقت سره د هرات زلزله ځپلو کورنيو ته رسیږي.
