د اطلاعاتو او کلتور وزارت سرپرست سپین بولدک ولسوالۍ کې د احمدشاهي حوض د بیارغونې پرانیستنه وکړه

نن شنبه(۱۴۴۴۵/۳/۲۲ هـ ق) د اطلاعاتو او کلتور وزارت سرپرست وزیر ملا خيرالله خیرخواه د کندهار سپین بولدک ولسوالۍ ته د احمدشاهي حوض د بیارغونې په موخه سفر وکړ، چې د کندهار د اطلاعاتو او کلتور رئيس مولوي انعام الله سمنګانی، د تاریخي آبداتو رئيس انجنیر محمد حسیب نسیمي او یو شمېر نورو مسؤلینو یې ملتیا کوله.
په پیل کې وزیر صاحب د سپین بولدک ولسوالۍ د رباط د سیمې له علماء کرامو، قومي مخورو او ځوانانو سره وکتل، وروسته یې د لوی امپراطور احمدشاه بابا د حوض د بیارغونې چارې افتتاح کړې. 
ښاغلي خیرخواه د یادې سیمې خلکو ته په وینا کې وویل: ددې سیمې هر وګړي درد ولید، د تېر شل کلن اشغال په مقابل کې یې پوره ونډه اخیستې وه، د اسلامي امارت سره په څنګ کې ولاړ وه او زیاته یې کړه د ټولو لپاره لویه خوشحالي داده چې الله تعالی لوی نصرت راپه برخه کړ.
خیرخواه صاحب زیاته کړه: موږ او تاسو باید په خپلو کورونو کې دین محکم وساتو، د افغان ملت د بریا مهم راز د الله تعالی سره اړیکه وه.
ورپسې د سیمي علماء کرامو په خپل وار خبرې وکړې، دوی له وزیر صاحب او مل پلاوي څخه مننه وکړه چې دې سیمې ته یې پاملرنه وکړه، هغوی وویل: افغان حکومت او ملت یو وجود ګرځېدلی دی.
وروسته وزیر صاحب د مسؤلینو او د سیمې د خلکو په ملتیا د لوی امپراطور احمدشاه بابا د حوض د بیارغونې افتتاح وکړه. 
وزیر صاحب هلته په وینا کې وویل: موږ د تاریخي سیمو په ساتنه کې پوره هڅه کوو، څو د مېړنیو تاريخ ژوندی پاتي شي او زیاته یې کړه ولس دې خپل مسؤلیت په ښه توګه ادا کړي.
د یادونې وړ ده چې دوې ورځي وړاندې د لوی امپراطور احمدشاه بابا کور، مقبرې او میرویس خان نیکه د مقبرې د بیارغونې پروژو افتتاح وشوه.