د آمو کلتوري او ادبي ټولنې غړو د تخار د اطلاعاتو او کلتور له رئيس سره وليدل
نن سه شنبه (۷ د جماديالثاني ۱۴۴۵) تخار ولايت کې د آمو ادبي او کلتوري ټولنې غړو د اطلاعاتو او کلتور له رئيس ذبيح الله انصاري سره په دې ولايت کې د آمو ادبي او کلتوري ټولنې د فعاليتونو او هڅو په اړه ناسته ترسره کړه.
د ټولنې غړو د خپلو ترسره کړيو فعاليتونو او ادبي خپرونو په اړه معلومات ورکړل او تخار ولايت کې يې د ادبي او کلتوري پروګرامونو او مشاعرو د ترسره کولو لپاره د اطلاعاتو او کلتور رياست څخه د همکارۍ غوښتنه وکړه.
د اطلاعاتو او کلتور رئيس ذبيح الله انصاري په ټولنه کې د شعر او شاعر په ارزښت خبرې وکړې او شاعر يې د يوه هېواد پانګه او د کلتور ژبه وباله، نوموړي د آمو ادبي او کلتوري ټولنې غړو ته د ادبي او کلتوري پروګرامونو د ترسره کولو په اړه د هر ډول همکارۍ ډاډ ورکړ.
