د۱۷مې ګڼې فرمان په اړه د ترسره شوې سیالۍ مخکښ ګډونوال وستایل شول
د کاپیسا ولایت د اطلاعاتو او فرهنګ ریاست او تنویر فکري او فرهنګي ادارې له لوري د عالیقدرامیرالمؤمنین (حفظه الله) د ۱۷مې ګڼې فرمان په اړه د ښوونځیو او مدرسو ۱۰۰۰ تنو زدهکوونکو ترمنځ سیالي ترسره شوې وه، چې پایلې یې اعلان او مخکښ ګډونوال یې په بېلابېلو ډالیو ونازول شول.
د غونډې ویناوالو د اسلامي امارت د مشرتابه د فرامینو، په ځانګړي ډول د ۱۷مې ګڼې فرمان چې د ناوړه دودونو د مخنیوي په اړه صادر شوی دی، د عملي کولو پر اهمیت ټینګار وکړ او له ګډونوالو څخه یې وغوښتل چې په ټولنه کې د ناوړه دودونو د له منځه وړلو لپاره هڅې وکړي.
د یادونې وړ ده، چې د یادې سیالۍ لومړي مقام ګټونکي ته یو کمپیوټر، دوهم مقام ګټونکي ته یو ځیرک موبایل او درېیم مقام ګټونکي ته یو عراده بایسکل ډالۍ ورکړل شول.
۱۴۴۷/۱۲/۲۲ هـ ق
