حسينه ساپۍ: د واټونو په نومولوکې بايد د تاريخي نومونو ساتنې ته پاملرنه وشي
د اطلاعاتو او فرهنګ وزارت د سرپرستې حسينې ساپۍ په مشرۍ نن د واټونو د نومولوکمېسيون ناسته وشوه.
د باختر آژانس خبريال د خبرله مخې: په ناسته کې د کمېسيون غړيو د واټونو د نومولو پنځه مورده چې د هېواد له مرکز او ولايتونو څخه يوشمېر دولتي او خصوصي بنسټونو کمېسيون ته استولي وو، وڅېړل.
دغه راز دوى د دغو مواردو په اړوند د کمېسيون د اصولو او صلاحيتونو له مخې خپلې نظريې او پيشنهادونه وړاندې کړل او لازمې پرېکړې يې وکړې.
په همدې ترتيب د اطلاعاتو او فرهنګ وزارت سرپرستې، د کابل ښار د پنځمې، شپږمې، شپاړسمې او اوولسمې ناحيې د واټونو د نومولو د ليست په اړوند چې کابل ښاروالۍ د منظورۍ په موخه د واټونو د نومولو کمېسيون ته استولى دى؛ د کمېسيون غړيو ته دنده وسپارله چې دغه ليست په دقيق ډول مطالعه کړي او په راتلوونکې ناسته کې خپل معلومات وړاندې کړي.
حسينې ساپۍ دغه راز ټينګار وکړ چې د واټونو په نومولوکې بايد د تاريخي نومونو ساتنې ته پاملرنه وشي.
