جلال آباد کې د ماشومانو کتابتون ته د حرفوي زده کړو اړوند لوازم وسپارل شول

د ننګرهار ولایت د اطلاعاتو او کلتور ریاست تر چتر لاندې د ماشومانو کتابتون ته د شانتي ادارې لخوا د حرفوي زده کړو لپاره اړین لوازم ورکړل شول. 
دې وسایلو کې د جامو ګنډلو ماشینونه، رختونه او نورو اړوند لوازم شامل دي، چې د شانتي ادارې د مسوولینو په وینا؛ د ماشومانو د حرفوي مهارتونو په پراختیا کې به مهم رول ولوبوي.
په ورته مهال د ننګرهار د اطلاعاتو او کلتور رئیس قاري احسان الله ساجد د دغې همکارۍ له امله یادې ادارې څخه مننه وکړه او دا لوازم يې د ماشومانو راتلونکي لپاره ګتور وبلل.
د نوموړي په وینا؛ د حرفوي زده کړو پر مټ به ماشومانو ته نوې فرصتونه برابر شي او دوی به په دې برخه کې نوي مهارتونه ترلاسه کړي، چې راتلونکی به یې ورسره روښانه وي.
د يادونې وړ ده، چې شانتي اداره د هېواد په مختلفو سیمو کې د ماشومانو د تعلیمي پرمختګ او ټولنیزو مرستو په برخه کې فعالیت کوي.

۱۴۴۶/۵/۱۰ هـ ق
۱۴۰۳/۸/۲۲ هـ ل