بلخ کې له مطالعې سره د ځوانانو ليوالتیا ډېره شوې ده

د بلخ ولايت د اطلاعاتو او کلتور رياست مسؤلين وايي: سره له دې چې د مجازي نړۍ او ټولنيزو رسنيو کارول د ځوانانو ترمنځ ورځ تر بلې پراخېږي، خو د بلخ ولایت ځوانانو بیا د مطالعې پر لور ډېره لیوالتیا پيدا کړې ده، هره ورځ ګڼ شمېر ځوانان د مزارشریف ښار د مولانا خسته عامه کتابتون ته چې شاوخوا پنځلس زره بېلابېل کتابونه پکښې موجود دي، مراجعه کوي.
د اطلاعاتو او کلتور رئیس مولوي محمدالله ضرار وایي: د ځوانانو ترمنځ د مطالعې لیوالتیا د يوه هېواد د روښانه فرهنګي او علمي راتلونکي نښه ده، په مولانا خسته عامه کتابتون کې دا مهال ډيری علمي منابع شته، خو د لوستونکو ټولو ستونزو ته ځواب نشي ويلای، نوموړي ډاډ ورکړ، چې هڅه کوي، د فرهنګي بنسټونو او مرسته کوونکو ادارو په ملاتړ دې ولايت کې عامه کتابتونونو ته نوره هم وده او پراختیا ورکړي، تر څو دې برخه کې اوسنۍ ستونزې ختمې شي او د مطالعې کلتور نور هم پراخه شي.
د یادونې وړ ده، چې بلخ ولايت کې د عامه کتابتونونو تر څنګ خصوصي کتابتونو ته هم هره ورځ زرګونه ځوانان د مطالعې په موخه ورځي، چې تر پخوا يې شمېر کې زیاتوالی راغلی دی.

۱۴۴۷/۱/۱۱ هـ ق