بغلان کې د مشاعرو د تنظيم قانون د تشريح غونډه او مشاعره جوړه شوه 

د بغلان ولايت د اطلاعاتو او کلتور ریاست له لوري د امیرالمؤمنین حفظه الله د ۲۲ مې ګڼې فرمان چې د مشاعرو د تنظیم قانون دی، د تشريح په موخه د دې ولایت لسګونو شاعرانو، ادیبانو او لیکوالانو سره معلوماتي غونډه او مشاعره ترسره شوه.
د بغلان د اطلاعاتو او کلتور رئیس مولوي اسدالله مصطفی هاشمي وویل: د مشرتابه مقام مشاعرو او شاعرانو ته ځانګړې پاملرنه لري، نو ځکه یې پدې اړه قانون جوړ کړی، ترڅو چارې یې منظمې او په ښه ډول مخته یوړل شي، چې پکې د شاعرانو، مشاعرو او ادبي غونډو جوړونکو ته مسؤلیتونه او مکلفیتونه واضح شوي دي.
ښاغلي هاشمي د تاریخ په اوږدو کې د شعر د اثراتو او رول په اړه هر اړخیزې خبرې وکړې او ويې ويل: شاعران باید په خپلو شعرونو او نظمونو کې داسې کلام ځای پرځای کړي، چې ولسونو کې د یووالي او همکارۍ روحيه پياوړې کړي او د اسلام مبارک دین په ګټه وي.
نوموړي زیاته کړه؛ په بغلان ولایت کې د فرهنګي فعالیتونو پراختیا ته ژمن دي او ډاډ یې وښوده، چې فرهنګي چارې تر پخوا، اوس په پوره همغږۍ سره ترسره کیږي، تر څنګ يې غوښتنه وکړه، چې شاعران دې په خپلو منظومو اثارو کې د افغانانو ټولنیزو، دیني، هیوادنیو او ملي ارزښتونو ته ځانګړې پاملرنه وکړي.
د مشاعرې ګډونوالو هیله وکړه، چې د نوي قانون په عملي کېدو سره به په ټولنه کې د خرافاتي فرهنګونو مخنیوی وشي.
 همدا راز مشاعره کې ادیبانو او شاعرانو د نوي جوړ شوي قانون د هرکلي ترڅنګ خپل نظمونه او شعرونه هم ګډونوالو ته واورول، چې له تود هرکلي سره مخ شول.

۱۴۴۷/۲/۶ ھـ ق