بامیانو کې له تاریخي کلاوو څخه لیدنه او څارنه وشوه

د بامیانو ولایت د اطلاعاتو او کلتور رئیس قاري سید مصطفی صالح د یوه پلاوي په مشرۍ د دغه ولایت د شیبر ولسوالۍ د غندک سیمې د سرخوشک تاریخي کلا او د کافر قلات کلا څخه لیدنه او څارنه وکړه.
نوموړي د خپل سفر موخه د کافر قلات کلا ثبت، د دې تاریخي او کلتوري ځای د برجونو، مغارو او عمومي وضعیت ارزونه وبلله.
ښاغلي صالح د سرخوشک کلا د بامیانو له پخوانیو تاریخي ودانیو څخه وبلله او ويې ویل: د اطلاعاتو او کلتور ریاست هڅه کوي، چې د تاریخي ځایونو څخه دقیقه څارنه وکړي او دغه لرغوني آبدات او آثار داخلي او بهرنیو سیلانیانو ته په سمه او بشپړه توګه وروپېژني.
قاري صالح همداراز د غندک سیمې د کافر قلات کلا څخه هم لیدنه وکړه او د دې ځای لرغونتیا ته په کتو یې نوموړی ځای د بامیانو د تاریخي او لرغونو ساحو په لېست کې ثبت کړ.
د اطلاعاتو او کلتور رئیس د څارنې پر مهال د غندک سیمې له یو شمېر اوسېدونکو سره د تاریخي آثارو د ارزښت او ساتنې په اړه هم خبرې وکړې او له هغوی یې وغوښتل، چې د دغو ارزښتناکو آثارو د ساتنې په برخه کې له اطلاعاتو او کلتور رياست سره همکاري وکړي.

۱۴۴۶/۹/۲۲ ق
۱۴۰۴/۱/۲ ل