اته تنو بهرنيو سيلانيانو باميان ولايت ته سفر وکړ
پنجشنبه ( ۱۱ د رمضان المبارک ۱۴۴۵) د سلواکيا هېواد اتو تنو اوسيدونکو باميان ولايت ته د سياحتي او لرغونو سيمو څخه د ليدنې په موخه سفر وکړ.
د باميان ولايت د اطلاعاتو او کلتور رئيس مولوي صفی الله رائد وايي: ياد ولايت کې د امنیت تامينيدل او د ليدنې وړ سياحتي او لرغوني ځايونه ددې سبب شوي دي، چې ډېر بهرني او کورني سيلانيان دلته د سياحت په موخه راشي.
د يادو سيلانيانو له ډلې څخه ښاغلي پيتر کيس وويل: خوښ يم چې په باميان ولايت کې يم، او د سفر دليل مې په باميان ولايت کې د بودا تاريخي مجسمې څخه چې د نړۍ له جاذبو تاريخي آثارو څخه ده، ليدنه وه.
ښاغلي کيس زياته کړه؛ افغانستان ته د سفر په ترڅ کې مو د کابل، هرات او مزار شريف له تاريخي آبداتو څخه هم ليدنه کړې ده، چې د خوږو او تلپاتې خاطراتو سره به بېرته خپل هېواد ته ستانه شو.