د فوتوکاپي مرکزونو له مسؤلینو، کتاب پلورونکو، لیکوالانو او خپرندویانو سره د همغږۍ غونډه ترسره شوه

د کاپیسا د اطلاعاتو او فرهنګ ریاست له لوري د فوتوکاپي مرکزونو له مسؤلینو، کتاب پلورونکو، لیکوالانو او خپرندویانو سره د همغږۍ غونډه ترسره شوه.
د اطلاعاتو او فرهنګ رئیس مولوي کریم الله وثیق د عالیقدر امیرالمؤمنین (حفظه الله) له لوري د ۷۲۰۶/۳۴۶۶ ګڼې فرمان تشریح کړ، چې د دغه فرمان له مخې په بلنلیکونو، د خط په پاکټونو او هغه کاغذونو چې په بې ځایه ځایونو کې غورځول کیږي د قرآنکریم مبارکو آیتونو، د الله تعالی او د پیغمبر(ص) د نومونو لیکل منع دي، نوموړي د دې کار په مخنیوي ټینګار وکړ.
ښاغلي وثیق د غونډې پر مهال له چاپ څخه مخکې د کتابونو ارزونې په اړه هم خبرې وکړې او ویې ویل: هر کتاب باید له چاپ مخکې د کتابونو د ارزونې کمېسیون ته وړاندې شي. همدارنګه هر لیکوال او خپرندوی باید د خپل کتاب لپاره د اطلاعاتو او فرهنګ وزارت څخه د ISBN شمېره ترلاسه کړي، ترڅو په راتلونکي کې د کتابونو د چاپ او خپرولو بهیر منظم او اصولي شي، د لیکوالانو او مؤلفانو حقوق خوندي پاتې شي او له غیرقانوني کړنو څخه مخنیوی وشي.
د غونډې په پای کې د فوتوکاپي مرکزونو مسؤلینو، کتاب پلورونکو، لیکوالانو او خپرندویانو د دا ډول غونډو له جوړولو څخه خوښي څرګنده کړه او ډاډ یې څرګند کړ، چې یاد فرمان به په پوره توګه پلي کړي او د خپرندویانو او لیکوالانو د حقونو د ساتنې په برخه کې به بشپړه همکاري وکړي.

۱۴۴۷/۱۱/۲۳ هـ ق