د جهادي ارزښتونو ساتنې عمومي رئیس د کونړ د اطلاعاتو او کلتور ریاست له مسؤلینو سره وکتل
د جهادي ارزښتونو ساتنې لوی ریاست عمومي رئیس مولوي ذبیحالله نوراني او د یاد ریاست یو شمېر نورو مسؤلینو د کونړ ولايت د اطلاعاتو او کلتور ریاست له مسؤلینو سره وکتل.
په دې ناسته کې مولوي ذبیحالله نوراني د نوي جوړ شوي جهادي ارزښتونو ساتنې ریاست د مسؤلیتونو او صلاحیتونو په اړه هر اړخیز معلومات وړاندې کړل، نوموړي وویل: د دې ریاست جوړېدو موخه د تېرو شلو کلونو د اشغال پر مهال د مجاهدینو بېلابېلو قربانیو او جهادي آثارو راټولول، ارشیف کول او په موزیم کې خوندي کول دي، تر څو دا کار راتلونکو نسلونو ته د مجاهدینو د سرښندنو ریښتینی انځور وړاندې کړي.
مولوي نوراني زیاته کړه؛ د دې مهم کار لپاره باصلاحیته کمېټې جوړې شوي او په ډېره روڼتیا به خپلې دندې پر مخ وړي.
په ورته وخت کې د کونړ اطلاعاتو او کلتور ریاست د فرهنګ آمر مولوي منیبالله شاکر د راغلي پلاوي له راتګ څخه مننه وکړه او ډاډ یې ورکړ، چې دوی ته سپارل شوي مسؤلیتونه به په ښه ډول ترسره کړي، نوموړي د ریاست له ځینو شته امکاناتو هم پلاوي ته معلومات ورکړل.
په پای کې راغلي پلاوي د ریاست له کارکوونکو سره یو ځای د جهادي آثارو له بېلابېلو برخو لیدنه وکړه او یاد چاپېریال یې د موزیم او ارشیف لپاره مناسب وباله.
۱۴۴۶/۷/۹ ھـ ق
۱۴۰۳/۱۰/۲۱ ھ ل
