د اطلاعاتو او کلتور وزارت د خپرونو چارو معین په قطر کې د اسلامي امارت له سفير سهیل شاهین سره وکتل
چهارشنبه ( ۲۱ د رجب ۱۴۴۶) د اطلاعاتو او کلتور وزارت د خپرونو چارو معین ښاغلي مولوي مهاجر فراهي په خپل کاري دفتر کې د قطر لپاره له نوي ټاکل شوي افغان سفیر محترم سهیل شاهین سره وکتل.
د ليدنې په ترڅ کې دواړو لوریو د مطبوعاتي برخې د تقویې پر میکانیزم، د کتابونو د چاپ د پروسې په پراختيا او نورو مسائلو باندې تفصیلي خبرې وکړې.
ښاغلي مهاجر فراهي په مطبوعاتي او نشراتي برخه کې د خپلو فعالیتونو په هکله معلومات ورکړل او ترڅنګ یې په هغو لارو چارو هم بحث وشو، چې څنګه یې له مخې خدمات لا پراخ او هر اړخیز کېدلای شي.
نوموړي دغه راز د ا.ا.ا په نشراتي برخه کې د امارتي او خصوصي رسنیو د فعالیت سربېره د کتابونو او قرانکریم د چاپ په برخه کې د ملموسو فعالیتونو يادونه وکړه او ويې ويل: هڅه کیږي ترڅو لا ښه او اغیزمن پرمختګونه تر سره شي.
همدا راز ښاغلي شاهین د اطلاعاتو او کلتور وزارت لاسته راوړنې د پام وړ وبللې او د لا نورو پرمختګونو هيله یې څرګنده کړه.
۱۴۰۳/۱۱/۳ ل
۲۰۲۵/۱/۲۲ ز
