د نورستان اطلاعاتو او کلتور ریاست ته یو شمېر جهادي اثار وسپارل شول
د نورستان ولایت د اطلاعاتو او کلتور ریاست اړوند د جهادي ارزښتونو مدیریت ته د دغه ولایت دواب ولسوالۍ ډلګي مشر قاري ملنګ له لوري یو شمېر جهادي آثار( یوه مخابره، سټلایټ، عکاسي کمره، او د امریکایي ټانک پايپ) وسپارل شول.
د اطلاعاتو او کلتور ریاست اړوند جهادي ارزښتونو مدیر د ډلګي مشر قاري ملنګ څخه مننه وکړه او ویې ویل: د جهادي مبارزې آثار د راتلونکو نسلونو لپاره خورا مهم ارزښت لري، نوموړي له نورو ډلګۍ مشرانو او مجاهدینو هم وغوښتل، چې خپل جهادي آثار یاد مدیریت ته د ساتنې په موخه وسپاري.
د جهادي ارزښتونو مدیر زیاته کړه؛ هڅه کوو چې د شل کلن اشغال په وړاندې د مبارزینو او مجاهدینو آثار راټول او په جهادي موزيم کې خوندي کړو، ترڅو راتلونکي نسلونه ترې د تاریخي آثارو په توګه ګټه واخلي.
۱۴۴۷/۳/۲۲ هـ ق
