د سیاحتي، زیارتي، روغتیایي، حج او عمرې شرکتونو اتحادیو کارکوونکو ته د ظرفیت لوړونې درې ورځنی سیمینار پیل شو

شنبه (۱۴۴۷ د ذوالقعده الحرم ۲۹مه) د اطلاعاتو او فرهنګ وزارت د ګرځندوی، مالي او اداري معینیت اړوند د ګرځندوی د څېړنې او پراختیا ریاست د ټوریزم او هوټلدارۍ انسټیټیوټ د سیاحتي، زیارتي، روغتیایي، حج او عمرې شرکتونو د اتحادیو کارکوونکو ته د ظرفیت لوړونې درې ورځنی سیمینار جوړ کړ.
مسوولینو د دې سیمینار موخه د سیاحتي، زیارتي، روغتیايي، حج او عمرې شرکتونو د اتحادیو کارکوونکو د علمي ظرفیت لوړول، د خدمتونو د معیاري کولو په موخه د اصولو او معیارونو پېژندل، مراجعینو ته د خدمتونو د کیفیت ښه کول، د مدیریتي، ارتباطي او عملي مهارتونو پیاوړتیا او له قوانینو، مقرراتو او مسلکي اخلاقو سره بلدتیا یاده کړه.
په دې سیمینار کې د ګرځندوی د څېړنې او پراختیا رئیس، د سیاحتي، زیارتي، روغتیايي، حج او عمرې شرکتونو د اتحادیو رئیسان، د ټوریزم او هوټلدارۍ انسټیټیوټ آمر او استادانو، د سیاحتي شرکتونو استازو او د انسټیټیوټ زده کړیالانو ګډون کړی و.
د ګرځندوی د څېړنې او پراختیا رئیس مولوي محمد صادق صداقت ګډونوالو ته د ښه راغلاست ترڅنګ وویل: دا سیمینار د یادو شرکتونو د کارکوونکو د ظرفیت لوړونې او د چارو د ښه والي لپاره جوړ شوی دی.
د ټوریزم او هوټلدارۍ اسټیټیوټ آمر مولوي محمد زمان ناصري د ګرځندوی د ارزښت او اهمیت، د انسټیټیوټ د موخو، په هېواد کې د سیاحت د فرهنګ د عامول او د انسټیټیوټ د مثبت اغېز په اړه خبرې وکړې. نوموړي زیاته کړه، چې د اطلاعاتو او فرهنګ وزارت سیاحت ته ځانګړې پاملرنه لري. همدارنګه یې د دغو شرکتونو له کارکوونکو څخه وغوښتل چې د برابر شویو فرصتونو څخه د خپلو چارو د ښه والي لپاره ګټه واخلي.
د زیارتي او حج او عمرې اتحادې رئیس محمد ګلاب سلطان‌زوی او د روغتیايي او سیاحتي اتحادیې رئیس قاري احمد سیر رحیمي په دې روزنیز سیمینار کې د سیاحتي شرکتونو د فعالیتونو پر معیاري کولو، د سیاحتي، روغتیايي او زیارتي خدمتونو پر ښه وړاندې کولو او د اتحادیو ترمنځ پر همکارۍ ټینګار وکړ.
دوی د امنیت د ټینګښت، د خلکو د مېلمه‌پالنې او د اطلاعاتو او فرهنګ وزارت له‌خوا د سیاحت ودې پاملرنې ته په اشارې سره وویل: تر اوسه زرګونه بهرني سیلانیان افغانستان ته راغلي دي او باید د هېواد ریښتینی او مثبت انځور نړۍ ته وړاندې شي.
د یادونې وړ ده، چې د دې درې ورځني سیمینار په ترڅ کې به د سیاحت او د هغه ډولونو، سیاحتي جاذبو، د اسلام له نظره سیاحت، د سیاحت اقتصادي اغېزو، بازارموندنې، بریښنایي سیاحت، سیاحتي خدمتونو او د کورنیو او بهرنیو سفرونو د طرحې د اصولو په اړه ګډونوالو ته هراړخیز معلومات وړاندې شي.

۱۴۴۷/۱۱/۲۹ هـ ق