نورستان کې د حرفوي زده کړو مرکزونه جوړېږي
د شانتي رضاکاره ټولنې له لوري د اطلاعاتو اوکلتور رياست تر چتر لاندې د نورستان ولایت مرکز پارون او واما ولسوالۍ کې ښځو لپاره د حرفوي زده کړو مرکزونه جوړېږي.
د شانتي رضاکاره ټولنې مسؤل موسی کلیم د نورستان د اطلاعاتو او کلتور رئیس مولوي سمیع الحق حقبیان سره د لیدنې پر مهال وویل: د یادو مرکزونو په پرانېستلو سره به ښځو ته د خیاطۍ او ګلدوزۍ په برخه کې روزنه ورکړل شي.
ښاغلي کلیم زیاته کړه؛ د دې پروژې موخه د ښځو اقتصادي پیاوړتیا او د کورنۍ لپاره د حلالې روزۍ پیدا کول دي، د یادو مرکزونو لپاره د جامو ګنډلو ماشینونه، برقي سامان آلات، او نور اړین توکي انتقال شوي دي.
د اطلاعاتو او کلتور رئیس مولوي سمیع الحق حقبیان د شانتي رضاکاره ټولنې دغه نیک اقدام وستایه او د هر ډول همکارۍ ژمنه یې وکړه.
نوموړي وویل: د دې پروژې پر مټ به د ښځو اقتصادي وضعیت ښه شي او هغوی به د ځان بسیاینې پر لور ګام واخلي.
د یادونې وړ ده، چې د دې حرفوي زده کړو مرکزونو جوړېدل به نه یوازې د ښځو د اقتصادي پیاوړتیا سبب شي، بلکې د ټولنې د بې وزلو کورنیو لپاره به د ګټې وسیله هم وګرځي.
۱۴۴۶/۷/۲۷ ق
۱۴۰۳/۱۱/۹ ل
