د لغمان اطلاعاتو او کلتور ریاست له لوري اونیزه مشاعره جوړه شوه
دغه مشاعره د لغمان عامه کتابتون کې جوړه شوې وه، چې د اطلاعاتو او کلتور د رئیس مولوي عبدالنور رسولي ترڅنګ یو شمېر شاعرانو او د اطلاعاتو او کلتور ریاست کارکوونکو پکښې ګډون کړی وو.
پیل کې د امربالمعروف رياست محتسب مولوي شبیر احمد عثماني د اسلام له نظره د شعر لیکلو او ویلو په اړه مفصلې خبرې وکړې او ويې ويل: د پیغمبر "ص" په زمانه کې هم ګڼ شمېر اصحابو کرامو شاعري کړې ده او د دوی د شعرونو ستاینه هم شوې ده، په اوس وخت کې هم شاعران باید داسې شعرونه ولیکي، چې ښه پیغام ولري او خلک ترې پند واخلي.
داطلاعاتو او کلتور رئیس مولوي عبدالنور رسولي ګډونوالو ته د ښه راغلاست ترڅنګ په خپلو خبرو کې وویل: د اطلاعاتو او کلتور ریاست د کلتوري پروګرامونو ترڅنګ مشاعرې ترسره کوي، چې ګڼ شمېر شاعران پکښې ګډون کوي.
نوموړي زیاته کړه؛ شعرونه د اذهانو په رغونه او پوهنه کې مهم رول لري، په کار ده چې شاعران داسې شعرونه ووایي، چې ټولنې او خلکو ته پکښې رغنیز پیغامونه موجود وي.
مشاعره د لغمان تکړه شاعر الحاج شهزاده شیرین زوی په شعر سره پیل شوه، چې وروسته نورو شاعرانو په خپل وار سره بېلابېل شعرونه ګډونوالو ته واورول.
۱۴۴۶/۵/۱۹ هـ ق
۱۴۰۳/۹/۱ هـ ل
