کندهار کې د تاريخي آثارو د قاچاق مخه ونیول شوه
په کندهار کي بهرنيو هيوادونو ته د یوې ډبرينې کټوې او یو میل تاریخي تفنګچې د قاچاق مخه ونيول شوه.
د اطلاعاتو او کلتور ریاست د هنر او فرهنګ آمر عبدالشکور څپاند وايي: دغه تاريخي آثار په احمدشاه بابا هوايي ډګر کي بهرنيو هيوادونو ته د قاچاق کولو پرمهال ونيول شول.
نوموړي وويل چي د اټکل له مخې ډبرینه کټوه په غزنوي او تیموري دورې او تفنګچه بیا د ۱۹ پیړۍ پورې اړوند تاريخي لرغونتوب لري، چې د ثبت او سجل تر پروسې وروسته به کندهار موزيم کې نندارې ته وړاندې شي.
د يادونې وړ ده، چې د اطلاعاتو او کلتور رياست تل هڅه کوي، چې د تاريخي منقولو او غير منقولو آثارو د پېرودلو، پلورلو او قاچاق مخه ونيسي.
۱۴۴۶/۵/۱۰ هـ ق
۱۴۰۳/۸/۲۲ هـ ل
