د کندهار په ارغنداب ولسوالۍ کي د امارت پېژندنې سيالۍ پايلي اعلان شوې
د کندهار ولايت د اطلاعاتو او کلتور ریاست اړوند د ځوانانو چارو آمريت له خوا د سلګونو ځوانانو څخه د امارت پېژندني کتاب سيالي څو ورځې وړاندې اخستل شوې وه، چې د يو لړ مراسمو په ترڅ کې يې پايلې اعلان شوې.
په مراسمو کي د کندهار د اطلاعاتو او کلتور د رئیس مولوي انعام الله سمنګاني تر څنګ يو شمېر نورو مسؤلينو او سلګونو ځوانانو ګډون کړی وو.
یاده سيالۍ کې شاوخوا ۳۴۰ کسانو ګډون کړی وو، چې د پايلو د اعلان پر مهال يې د لوړو نمرو اخيستونکو ځوانانو ته ارزښتمنې ډالۍ هم ورکړل شوې.
د اطلاعاتو او کلتور رئيس مولوي انعام الله سمنګاني د وينا پر مهال وويل: امارت پېژندنه د نوي نسل لپاره د لومړيتوبونو څخه ده، ځکه نوی نسل به په دې وپوهيږي، چي دغه اسلامي نظام په څومره قربانيو، تکاليفو او ستونزو سره منځته راغلی دی.
د ښاغلي سمنګاني په وينا؛ د امارت پېژندنې سيالۍ څخه یې بله موخه دا هم ده، چي نوی نسل د اسلامي نظام په جوړښت، ساتنه او پرمختګ کې خپل مسؤليت ادا کړي.
د ارغنداب ولسوالۍ د پوهني امريت د نظارت مسؤل مولوي عبدالغفار عمري بیا وویل: ځوانان دې مطالعه وکړي، تعليم دې وکړي او هر کس دې د اسلامي نظام په موخو پوه شي او د ټينګښت له پاره دې يې کار وکړي.
ښاغلي عمري ټينګار وکړ، چې ځوانان دې ديني او عصري تعليم وکړي، دا د وخت اړتيا ده، که چيرې ځوانان په عصري او ديني تعليم کې پرمختګ وکړي، د نړۍ له احتیاج څخه به خلاص شو.
د يادولو وړ ده، چي له دې وړاندې د کندهار په نورو ولسوالیو او د هيواد په يو شمېر ولايتونو کې هم ورته ازموینې اخېستل شوي دي.
۱۴۴۶/۵/۳ هـ ق
۱۴۰۳/۸/۱۵ هـ ل
